BAREN DINGHKUNG NTSA NA MANAU SHADUNG (DAW I)

“Manau Shadung” ngu ai gaw, Jinghpaw Wunpawng Htunghking hta ahkyak dik ai masat kumla kaba rai nga ai. Ndai htunghking masat kumla hpe manau nau ai lai hte kapyawn nna manu shadan shareng hkungga akyu jashawn ga ai. Shinggyim masha myu baw shagu gaw, htunghking hpra hpra lu shajang ai. Shingra masa hku byin pru wa ai wuhpung wuhpawng langai shing n rai, amyu sha langai a ngang grin lam, tsawm htap lam, shada kanawn mazum mahkri shawn nga pra lam ni gaw, dai wuhpung wuhpawng shing n rai, dai amyu sha ni a htunghking rai nga ai. Htunghking bung jang, tsun shaga ai ga mi n bung tim, amyu langai rai nga sai. Wuhpung langai hku kahkyin gumdin let makawp maga nga pra hkrat wa sai ni rai nga ai.

Jinghpaw Wunpawng sha ni a Manau Htunghking gaw, moi prat na jiwa ni Madai Nat hpe jaw jau ai lai kaw na lu la sai. Ya daini ten hta Madai Nat hpe n jaw jau saga ai. Htunghking manau san san hku sha matut hkan sa ga ai. Yehowa Karai Kasang hpe hkap la kamsham saga ai majaw, “ANHTE A AWNG PADANG YEHOWA KARAI KASANG” rai nga sai.

Raitim, ya ten Jinghpaw Wunpawng buga shara nkau mi hta, htunghking hte nhtan shai ai kumla hkan wa ai hpe mu lu ai. Dai gaw Manau Shadung hpe lapu baren a shingma dinghkung ntsa e jung nna gaw sharawt da ai lam rai nga ai. Htunghking ngu ai gaw, hkrang chyasi n rai; rawt jat galai shai wa ra ai lam rai tim, baren chyawm gaw Satan hte seng ai kumla rai nga ai. Dai majaw, baren shingma hta manau shadung jung ai lai gaw, jiwa ni a hkringhtawng n re sha, Satan a hkringhtawng, “Na ai kumla” “Unlucky Sign” rai nga ai.

Manau Shadung hpe baren shingma hta jung tawn nna, lera wora lachyum hpyan shajaw la ai mung, amyu sha ni hpe lam shadam ai lam san san, ga baw shatut nna galaw sha ai lam san san sha rai nga ai. Chyum Laika hta Mawshe pyi Israela amyu ni azi yu na matu magri lapu sharawt ai (Bu Hkawm 21:4-9) nga nna anhte a htunghking hte hpa n seng ai lam ni tsun gang shalawm wa ai. Jinghpaw maumwi hta Hkrai Naw yan Hkrai Gam gaw, shan a kawa hpe hkan tam yang, baren numraw hpe mu hkrup ai lam tsun shakap la ai. Jinghpaw num ni a soi palawng gaw, lapu sep, baren sep re; num nnan shalai yang, baren sing manam ai majaw, kumbang nhpang hku shalai yang she baren sing hkoi ai, nga nna hkai tsun ai maumwi ni hpe la kap la ai.

Maumwi gaw mabyin lam lama ma kaw na pru wa ai. Htunghking mung maumwi kaw na byin pru wa ai re. Raitim, manau shadung byin pru wa ai maumwi hta baren a lam n rawng ai. Madai Nat hpe jaw jau ai lam sha rawng nga ai. Ji nat jaw jau ai lai hpe tawn kau nna she Hkristan ni tai nga saga ai. Manau nau ai lai hpe amyu a htunghking hku hkan sa na hta jan nna, ji wa ni pyi n galaw ai Satan baren hpe n mai la bang sai. Karai Kasang Yehowa hta manoi manat let, amyu a htunghking hku sha hkan sa mai ga ai. Baren maka lang ai shara mung shi hte shi nga nga ai. Lawnghpau palawng ni gaw, baren maka kade lung ai ngu ai hta hkan nna she manu shareng la nga ai. Dai baren maka ni gaw, Miwa ni a lata hpaji hte htunghking maka ni she rai nga ai.

Mungkan hta amyu mungdan shagu gaw, tinang amyu, tinang mungdan a masat dawnghkawn, masat kumla u, masat nampan, amyu sha mahkawn ni san da ai lam nga shajang ai. Jinghpaw Wunpawng sha ni hku nna, amyu sha masat shing n rai, mungdan dawnghkawn lu saga ai. Amyu sha mahkawn “National Anthem” mung lu saga ai. Htunghking masat hku nna gaw, Manau Shadung rai nga ai. Sinwa U hpe amyu sha masat u ngu myit hkrum da ai lam nga sai. Jinghpaw Wunpawng buga shara nkau mi hta baren shingma e Manau Shadung jung da nga ma ai majaw, buga mungshawa hkra lep kanu kawa ni law law wa, myit n pyaw n ngawn hkam sha shajang nga ma ai.

“Baren” gaw Miwa ni a htunghking kumla she rai malu ai. Baren sumla n lang tim pyi, anhte a mungdan gaw, Miwa ni e krawk sha ma wa nga sai. Dai majaw daini anhte hkrum sha nga ai tsinyam lam ni law law mung, anhte n dum n shai n myit hkawn lu ai hku nna Karai Kasang hpe shut kau ai lam ni nga sai ngu myit dum sumru yu mai nga ai. Baren shingma ntsa e Manau Shadung jung ai lailen hpe grai jaw dum, hkrak dum, htuk dum ai ni law law wa, sung sung myit bai awai yu ra nga ai. Byin mai yang, jung kau rau sai Manau Shadung ni a npawt na baren sumla ni hpe lawan run kau, hpya kau, jasan jaseng kyu hpyi kau nhtawm, htunghking jet ai Manau Shadung hpe mahtang bai gaw sharawt la ging nga ga ai.

Ndai prat hta Miwa mung na kommyunit Jinghposu ni, India mungdan, Arunachal mungdaw na Bukda Singphaw ni hte Jinghpaw mung Uma buga na Hkristan Jinghpaw Wunpawng sha ni yawng gaw, htunghking manau hku sha galaw nga ga ai. American mung na Jinghpaw ni, Thai mung na Jinghpaw ni mung htunghking manau law law lang galaw sai hpe chye lu ai. Miwa mung, Saphkung mungdaw na Jinghposu la wangan marai manga gaw, htaw Majoi Shingra ga, Qinghai hka nawng makau, Jan Shata bum nga ai shara e htunghking manau sa manau kau da yu sai lam hpe mung na lu ai. Dai daram wa mungkan jut shagu htunghking manau hpe hkan nau shachyam wa tim, gara kaw mung baren sumla n lawm ai. Ji wa ni a hkringhtawng maka jet, tsawm htap wunli lu ai Manau Shadung hku sha galaw lang ai hpe chye lu ga ai.

Shiga na lu ai hte maren nga yang, Japan Mungdan du nga ai Jinghpaw Wunpawng sha ni mung htunghking manau kaba galaw na hkyen nga sai hpe na lu ai. Japan mungdan na Manau Shadung hpe baren shingma hta n jung hkrup na matu tau sadi jaw mayu ai. Amyu sha ni hpe awu asin Satan kumla hte n shayuk kau ga. American ni zawn Shata ga de chye lung wa dam yang mung, Shata ga e Manau Shadung wa jung na chyalu sha rai ga ai. Galoi mi jung jung, ganang mi jung jung, Jinghpaw Wunpawng sha ni a Htunghking Manau Shadung hpe baren dinghkung hta jung ai gaw, shut nan shut sai hpe dum shai myit malai shading sharai la ra ai lam rai nga ai.

Htunghking hpe lasap nna, amyu sha ni hpe lam n mai shadam kau ga ai. Manau Shadung hpe baren shingma e shawng jung hpang sai. Kade n na yang, Manau Shadung ntsa e hkanghkyi lung dung ai hku pyi bai sawn shapraw galaw shachyaw wa na hpe shingran yu nna tsang makran hpa rai nga ai. Htunghking hpe mawn sumli jat ai lam n re sha, amyu hpe lam shadam ai maga she rai nga ai. Jiwoi jiwa ni a hkringhtawng maka hpe jahten shaprai ai lam gaw yubak dingnye lam rai nga ai. Dingnye ngu ai hkrat wa jang, n hpru n mai ai Satan a lamik kumla amyu myu mung dawng pru wa chye ai. Daini hkrum sha nga ai tsinyam ni hpe sawn shakru yu let, anhte a shut hpyit mara tawngban ra ga ai. Yehowa Karai Kasang hta kaga, anhte a matu awng padang lam kaga n nga sai. (Matut hti ga)

Bum Kawyeng
6-4-2012 (jinghpawkasa kawn)