SI HKRUNG SI HTAN LAM

Jinghpaw ni kam ai hta masha gaw n mu lu ai From hkrang nga ai. Dai n mu lu ai hkrang hte mu lu ai mater ngau pa kahkyin kaprep jang asak hkrung ai shinggyim masha tai wa ai. Dai n mu lu ai hkrang hpe numla, minla ngu shamying ai. Masha asak hkrung nga ai ten hta numla gaw ndan leng ai raitim, nsa hti mat jang grai dan leng ai hku nga wa ai. Mu lu ai hkrang hte shinggang da ai majaw, n mu lu ai daw lup nga ai zawn rai nga ai. Hkrang n nga mat jang grau dan wa ai, kaga dusat hte arung arai ni hta gaw numla n nga tim nsoi nsa ngu ai nga ai. Hkrang mat jang, nsoi nsa ngam nga ai, sha ai baw rai yang, lu sin wa ngu ai nga ai. Kaga arung arai ni hta gaw manu ngu ai nga shajang ai. Dumsa ga hta manu nang ai tsun, tinghkra shang ai lun, nga nna rawng ai. Sha ai baw hpe gaw nat ni hku nna gaw lu sinwa sha sai nga ai, nga, wa, u, bainam ni hpe gaw nga soi mayung sai, nga sa mahkung sai nga ai, masha gaw hkum hkrang, hkum shan hpe numla hte hkrung taw nga ai.

Numla dam ai lam;- Shinggyim masha naw hkrung nga yang, numla dam ai ngu ai nga ai. Hkum shan hte numla hka garan mat jang si ai rai yang, dam ai shaloi n si mat ai kun? ngu san na lam pru wa ai. Dai lam ni hpe ntsa lam chye na na matu numla malawm law law nga ai ngu chye na ai. Lhovo hku na dumsa ga hta la numla kru, num numla sanit ngu tsun ai. Jinghpaw dumsa ga hta kade ngu ai n tsun ai, raitim, law law ngu tsun mayu ai. Ja Li La Raw a gawq kan ni yawng gu wa marit law nga nna numla shaga ai shaloi, lalaw ga hta rawng ai. Dai majaw masha marai langai mi hta numla madung hta kaga malawm ni naw nga ai lam chye lu ai. Dai malawm ni langai ngai dam mat chye ai.

Dai zawn rai numla dam ai lam gaw kajawng sawng mat ai, hkrit kahpra mat ai shaloi, numla manang ni kaw na hka mat chye ai. Shing nrai nat chyasam ni e dai numla langai ngai hpe rim tawn kau nna hkungga hpyi sha chye ma ai. Masha langai mi gaw numla n-gu mat ai shaloi, hkum n zeng mat ai hta kaga dai wa hpe lagat ni, gwi ni kawa chye nga ai. Numla dam n dam hpe ningwawt wa shamawn hta mung mu chye ai. Yi hkan rai yang, shingnawm nam de malat ni gasat hkat jang, numla dam chye ai.

Dai malat ni gaw nat a malai masha numla hpe rim makoi kashun hkat ai majaw, ga law gasat ai nga ma ai. Kalang lang kabai tawn kau sai yi wa ningsa kaw chyinghkyen pa shara mi masha tut nawng e dung shamu ai zawn krin taw chye nga ai. Kaja wa teng teng byin ai lam langai mi hpe tsun ga nga yang, Mali Hkrang walawng Mashaw woi wang ga kaw 1950 ning jan na laning mi hta e, Hkyet ni a nta kaw 2003 ning hta Shatapru kaw nga ai Hpungtau Hkyet La a kanau Hkyet Tang gaw grak dagra rai machyi ai lam n nga ai raitim, machyi chyana taw ai grai na sai.

Dai ten hta Rawang myihtoi Darawng Hka ngu ai shanhte a nta de sa du ai. Dai Darawng Hka ngu ai wa gaw myihtoi sha n rai, myi san mung rai nga ai. Myihtoi ngu ai gaw nat e shung jang malap mat ai hpe tsun ai. Myi san ngu ai gaw nat hte ading tawk mu mada lu ai hpe tsun nga ai. Myi san wa hku nna Hkyet Tang hpe mu ai hte rau, ndai Hkau Tang na numla hpe maning na yi shari na yi baw hpun pawt langai mi kaw nat ni e rim tawn da nga ma ai, nga nna tsun ai. Dai numla hpe hkraw lu na matu, myi san wa hpe nan jahkring tawn da masai. Hpang shani yi shari yi baw hkan na hpun pawt shagu hkan yu ai shaloi, hpun pawt langai mi a hpun pawt shinggrup nna lama mi hkawm kayin taw nga ai zawn krin taw nga ai hpe mu ma ai. Myi san wa bai tsun ai gaw jahtung yan sawn hpe wa lahkawng, u lahkawng hpra shagup nna jaw nhtawm hkraw la ra nga ai ngu nna tsun ai.Dai majaw dai shani jang, jahtung yan sawn hpe myi san wa tsun ai hte maren galaw sai. Shana maga de myi san wa bai tsun ai gaw garai n dat dat ma ai nga nna tsun ai. Myi san wa shi nan nat ni kaw bai sa nna kanu Nhkrai Kaw kasha hpe n jaq ai majaw, grai hkrap nga ai, lawan dat dat ya mi ngu nna nat ni hpe sa tsun ai.

Dai shaloi nat ni gaw dat dat sai, numla shi nan nta de wa n-gwi mat, wa n kam mat ai zawn rai nga ai da. Dai majaw myi san wa bai tsun ai gaw numla shaga lalaw ra ai nga sai. Dai nta masha ni gaw nbaw shat dam nna u hkrawng, u shan, nga shan ni tawn, udi tsahku ni tawn rai lalaw ai lam galaw sai. Lalaw ai shaloi, dumsa wa lalaw ga hte shawng na daw lalaw ai hte rau, hpun pawt kaw na yi wa dingsa kaw du sai lam, myi san wa tsun ai.

Dumsa wa gaw lahkawng lang numdaw nna bai lalaw ai shaloi, yi shari kaw nna mare numshang du wa sai, masum lang ningdaw nna lalaw yang, mare numshang kaw nna nta npan du wa ai, bai ningdaw nna lalaw ai shaloi, hka htingnat kaw wa du ai. Hka htingnat kaw nna nta gawk de n shang wa hkraw ai, dai majaw ri byan hpe hka htingnat kaw dun nhtawm, myi san wa dung ai shara kaw wa dun ai, dai kaw na kalang mi bai lu sha dam da ai shara de dun da nna lalaw yang, dai ri byan hku dam mat ai numla gaw hkadawn kanu tai nna pyen shang wa ai. Dai hpe kanu e hkap mahkyu la ai hte yup gawk de la mat wa ai.

Dai shaloi myi san wa tsun ai gaw numla nta de atsawm du wa sai lam tsun ai. Ndai lam hpe yu yang, numla ngu ai gaw nat mung rai, masha mung rai nga ai rai nna nat hte kanawn na wa jang, nat hte nga pyaw dum, masha hte kanawn na jang, masha hte nga pyaw dum rai chye ai lam rai nga ai.

Lalaw ai, (numla shaga ai);- Dam mat ai numla hpe bai shaga ai shaloi gaw dumsa matan ga hte shaga nga ai. Dai dumsa ga gaw kaga dumsa ga nsen hte n bung ai. Dai majaw dumsa ai ngu n tsun ai sha, lalaw ai ngu tsun ma ai. Shawng e tsun lai wa sai zawn, yi wa ningsa kaw na bai shaga la na rai yang, shaman wawt yu nna shaman hpru ai ni hte dumsa wa dai yi wa nsa de sa na rai nga ai. Dai yi wa dingsa de sa ai shaloi, nbaw shat, chyaru, udi, shan, jum, hpun palawng hte dumhkrak pasi, nba yan ni lawm sa na rai nga ai.

Shing rai yi wa ningsa du jang, nbaw shat hpe dam nna gun sa ai lu sha ni yawng shaw sumpum ai hpang dumsa wa lalaw ga hte numla hpe shaga dat na rai lu ai. Dumsa wa shaga tim numla n wa mayu sai, n wa lu sai rai yang, hkakrit, kadawn hkrung kanu, jinu zawn re ai sha pyi nbaw shat dam da ai de n sa wa chye ai. Numla bai wa na hku rai yang, lalaw ga na ai hte hkakrit, kadawn atsit amut hkum sumhpa hkrung kanu ni nbaw shat dam da ai de kahpru sa wa chye nga ai. Dai kadawn ni hpe pasi hte sanen nna rim nhtawm, gun sa ai kawa dumhkrak kaw bang la nna nba yan hte hkayawp ba mat wa na rai nga ai. Numla lawm ai rai yang, dai dumhkrak ba ai wa gaw masha langai ba ai daram ba chye nga ai. Li gaw n li ai, raitim, grai ba chye ai, numla n lawm wa ai rai yang, kaga masha ni hte maren sha ba chye nga ai.

Si Mat ai lam;- Masha si mat ai shaloi, numla gaw dai masha kaw na tsep kawp pru mat sai. Shing nrai numla pru mat jang masha gaw asak n rawng lu mat nga ai. Asak n rawng mat sai masha gaw numla hte garan mat sai rai nga ai. Raitimung, hkrang yan numla gaw langai sha rai nga ma ai. Langai sha raitim, kaga ga byin mat sai. Hkrang numla n rawng sai, numla mung hkrang n lu sai, shan lahkawng buga n bung hkat nga ai, hkrang gaw dinghta ga na rai nga ai. Numla gaw ntsa de nga ai Karai Kasang kaw na rai nga ai, dai majaw dai yan hpe garan nna buga madun kau ra sai.

Mangbru ai, mang makoi ai;- Numla gaw shi a buga de wa mat lu na matu hkum hkrang hpe shamat kau ra ai. Dai hkum hkrang hpe shamat ai bungli hpe mangbru, mang makoi nga ma ai. Mangbru, mang makoi ngut ai shana de gaw numla hpe shi a buga de shawawn kau lu sai. Dai majaw mangbru poi a hpungdim dat ai gaw tsu shawawn ai lam rai nga ai.

Tsu nat;- Jinghpaw ga tsu ai ngu tsun ai shaloi, kaja ai hte yat ai lapran na rai nga ai. Shat tsu ai ngu tsun ai shaloi, shat gaw rai nna sha n mai mat ai, yat mat ai ngu yang shat nan gaw naw rai nga ai. Dai hte maren, tsu nat ngu ai gaw nat ngu yang, hkrang naw nga ai, hkrang ngu yang gaw asak n rawng sai hpe tsu nat ngu tsun lu nga ai. Mang hpe n makoi kau dingsa tsu nat sha arai nga ai. Dai rai nna tsu nat hpe shat jaw sha ai shaloi gaw nat ni hpe jaw ai zawn n rai, nta masha sha ai shat hpe masha hpe jaw sha ai zawn daw jau nga ma ai.

Si ai Majun, Si ai Ningpawt;- Moi Karai Kasang gaw shinggyim masha ni hpe n si na hku hpan da sai. Dai majaw shinggyim masha ni hta si hkrung si htan hpa n nga ai sha nga nga ma ai. Dai aten hta jan gaw shani tup mai nna shana de jan shang ningsin sin mat ai. Shata mung shata jan mai nna shata si mat jang, kaji nna htum mat ai. Dai lam hpe shinggyim masha ni gaw jan wa hte shata wa si sai ngu nna jan ga de lahpu hpu lung ga ma ai.

Lahpu hpu ai shaloi gaw bunghkaw ngu ai kumhpa shat lit, shat kada, tsa dinghkang ni gun lung ra nga ai. Dai bunghkaw lit gun lung ai lam gaw shinggyim masha ni a matu lit li dik ai lam tai wa sai. Hpang e grai sum ai hku mung myit la wa masai. Hpa majaw nga yang, shinggyim masha ni gaw si ai lam n nga ai rai nna bunghkaw shat lit mung kadai n gun jaw nga ma ai. Dai hta kaga jan ga de mangbru poi nga ai raitim, shinggyim masha ni kaw gaw poi n nga ai rai nna lagawn bu nga ma ai. Shing rai shinggyim masha ni gaw masu na myit rawng wa nga ma ai.

Dai masu ai gaw masha shada n rai, jan wa shata wa ni hpe masu na hku rai wa sai. Masu na sha n-ga, Karai Kasang hpe n tsen ai lam mung byin nga ma ai. Dai n tsen ai lam gaw shanhte bunghkaw n lu sha ai hpe Karai Kasang gaw n teng man ai hku hpan da sai kun nga nna myit la nga ma ai. Shing rai shanhte kaw bunghkaw nhtang du na matu, mangbru poi masu galaw na myit wa nga ma ai. Raitim, mang n lu ai majaw, masu na mahkrun n lu hkraw taw nga ma ai. Dai aten hta nan hkrang hka hkahku kaw na shalung hpun ndung kaw galang kanu langai mi gaw galang tsip tsip nna galang kasha hkai ai rai nna kasha ni a shat tam rawt mat wa ai ten hta lapu langai mi shalung hpun ndung de lung nhtawm, galang kasha ni hpe sha kau sai. Galang kanu bai wa yu yang, kasha ni hpe n mu sai.

Kasha ni hpe sha kau ai kadai kun? tam mada masem jahproi mat wa yu yang, shalung hpun hpunban kaw tsahkai dingla langai mi yup taw ai hpe mu dat nu ai. Galang kanu gaw shi a kasha ni hpe sha kau ai gaw tsahkai rai na sai ngu shadu ai hte tsahkai nga ai de htim yu wa jang, tsahkai mung hpun lakung hkan nna hprawng mat wa yang, hkrang hka kaga hkran de nna tu sa wa ai hpun lakung hta moi shawng de shi naw ram nga yang, gumtsat kap lu ai rai nna ya mung bai gumtsat yu yang, shi hta dingla sai rai nna kaga hkran na hpun lakung de n hkap lu sai majaw, hkrang hka de di hkrat bang mat wa nhtawm, hka hpunla lam hku yawng mat wa sai. Dai tsahkai mang gaw shinggyim masha ni a madim kaw wa shang mara nga sai.

Hpang jahpawt e madim sa kawan ai brang ram ni sa mu yang, kadai re ai, hpa baw re ai shamying n chye ma ai majaw, nta de salang ni kaw wa hpai madun ai shaloi, salang ni gaw dai tsahkai mangbru nna jan ga de lasu su dat nhtawm, bunghkaw lu sha na hku di na myit lu masai. Dai hte maren, mangbru poi hkyen lajang nhtawm, jan ga de shabrang marai lahkawng hpe lasu su shangun dat sai. Jan wa gaw shinggyim masha ni a lasu su shi na ai shaloi grai mau mat sai.

Dai majaw lasu su ai yan hpe shinggyim masha kadai si sata ngu san yang, kadai si ai gaw hkrak n chye ai, raitim si ai gaw teng sai nga ai. Shaloi jan wa hte shata wa gaw shinggyim masha ni a asak sumri n hpe sumrat yu yang, gara mung n di, n nu ai majaw, masha kadai n si ai lam hpe chye sai. Jan yan shata gaw shan la rai nga ma ai. Shata wa a mying gaw Zau Doi rai nna jan jan a mying gaw Nang Koi rai nga ai. Kasha ni gaw jan ma na li, shata ma hpraw ji ngu ai ni rai ma ai. Shinggyim masha ni lasu su ai hpe kanu yan kawa n sa ai sha kasha ni hpe sha mungkan ga de dat dat masai. Jan ma ni mungkan ga de du ai ten hta shinggyim masha ni gaw mangbru poi galaw nga nga la sai. Ma ni a shing-ra hte maren, du ai hte rau sha na, pyaw na, ka manawt na sha chye ma ai, mangbru poi na mana shat mung grai mu ai hku asharawng shara sha kau masai. Kabung mung dum manawt lawm sai. Ndawng mung kahkrang lawm masai. Jan masha ni nan dai hku si lamang hpe galaw lawm ai a jaw e shinggyim masha ni gaw kadai n si ai raitim, si sai lam shagrin kau ai rai mat sai.

Hpang jahpawt gaw jan ma ni jau jau wa mat masai. Jan ma ni mare numshang du yang, shan nau ni kaw na marai langai mi gaw kanu yan kawa shinggyim masha kadai si sata? nga san yang, kaning ngu na nga sai, shaloi she mangbru poi de kalang mi bai nhtang sa nna si mang sa tam na hku myit lu nna bai nhtang sa ai. Shinggyim masha ni hpa rai bai nhtang sa ai lam san jang, shana e kabung dum ai shaloi, pasi jahkrat kau ang sai majaw, naw tam yu na ngu jut shingnaw shagu tam bram hkawm wa yang, nhprun kaw hka-awn hta awn yawn hte dagup da ai tsahkai mang hpe mu hkrup sai majaw, jan ga du ai shaloi, kanu yan kawa hpe shinggyim mang gaw n mu ai, tsahkai mang sha mu ai ngu wa tsun jang, tsahkai mang hpe shinggyim mang hku masu bru ai rai sai chye nna shinggyim masha hpe shawng e n si na hku hpan da sai raitim, shanhte nan nan si mayu ma ai majaw, gumgai dingla nna si na hku mungga bai jahkrat sai.

Dai mungga hpe mung ma ni hpe sa tsun shana shangun ai majaw, mungkan ga de bai sa wa ma yang, lam kaw sinnen mare kaw du ma ai. Sinnen ala wa gaw shi a shayi sha Nhtoi Raw si mat ai majaw, yawn ningtsang aten hta ang ai, kaja wa nga yang, sinnen ala shi a shayi sha gaw si ai n rai nga ai da. Di lang hpe si ai shadu nna yawn taw nga ai, sinnen ala gaw jan ma ni hpa rai mungkan ga de yu sa ai lam san jang, shinggyim masha ni asak ugut gu, gumgai dingla jang si shajang na hku sa tsun shangun nna yu sa wa ai lam tsun dan ai shaloi, sinnen ala gaw shi a kasha Nhtoi Raw mangai pyi si ai majaw, shinggyim masha ni mung ma kaji mahkawn shabrang yawng si na hku she sa tsun masu ngu ga jahten ai nhkan e mungkan masha ni asak aprat n lata ai sha si hkrung si htan hkrum ai re nga si majun gawn nga ma ai.

Mangbru Majun;- Mangbru poi galaw ai mung lachyum nga nga ai. Shinggyim masha a asak hkrung lam hpe lachyum shapraw ai lam rai nga ai. Makam masham langai hte langai, htunghking langai hte langai yawng ni gaw masha a asak hkrung lam hpe manu shadan lachyum shapraw dan ai ni hkrai rai nga ai. Jinghpaw htung hta si ai lamang gaw masha a asak hkrung lam hpe grau nna lachyum shapraw dan nga ai. Si ai majun, si ai lachyum hpe tsun saga ai rai nna mangbru ai lachyum hpe mung naw matut bawngban ra nga ga ai. Mangbru ai lachyum gaw mangbru majun gawn ai lam hta mu lu na rai nga ai.

Dai rai nna mangbru majun hpe tsun ga nga yang, Moi tsingdu hpun hte tsingman ban tu sai. Dai yan gaw tu jin, tu na nna jan ja ta hta hkraw si mat sai, lanam shang wa marang htu ai shaloi marang hka hte mang kashin sai, lanam marang e tsingdu mang hpe bru makoi yang, tsingdu pawt de tsingdu maku bai rawt ninghpawng wa sai. Tsingdu pawt langai mi hkraw si mat ai pawt kaw tsingdu maku law law bai prut wa sai. Marang hka e bru ai tsingdu mang gaw tsam yat nna ga bum jat ai, nam hpun law htam nna tsingdu ban ni hpe shawng na hta grau law htam kaba, tsit lali shangun nga ai. Shawng e hkraw tsam mat ai tsingdu gaw hpang e tu ai tsingdu hpe grau galu kaba na akyu jaw da nga ai.

Dai hpang hkatu hpun mung tu nna tu jin, tu na ai hpang hkraw sawng tsam mat sai. Hkatu hpun daw mat ai pawt nhpang de hkatu maku bai ninghpawng tu wa sai. Shawng na hkatu hpun chyahkraw shatsam hpe lanam marang e mang kashin nna bru makoi yang, ga bum jat, ga bum tsaw shingkawng nna hpang e tu ai hkatu ban ni hpe galu kaba alap lap, apu pu, asi si shangun nga ai.

Dai hpang chyahkya hpun mung tu jin, tu na jang, tsam nna daw mat sai, chyahkya pawt de chyahkya ban chyahkya nnaw bai rawt ninghpawng wa sai. Daw mat ai chyahkya hpun hpe gaw wuhkun e mangbru yang ga bum jat shingkawng nna lamu ga kaba dam shangun sai. Dai lamu ga hta chyahkya ban law law bai tu wa sai. Moi wulaw, wara nhpang mung tu jin, tu na nna nyawp mat sai. Daw mat ai kawa ni hpe lanam marang e mang kashin nna wuhkun e mangbru yang, ga bum jat shingkawng nna wahpang pawt de wulaw, wara makru bai ninghpawng wa sai. Dai ga bum hta kawa wahpang law law tu hpra chyam wa sai. Dai hpang shalung hpun hte shala hpun mung tu na, tu jin hpun daw nhtawm daw mat sai, punghkaw hpe lanam marang e mang kashin nhtawm, wuhkun e mangbru yang, ga bum jat shingkawng nna lamu ga jat dam lada, npawt nhpang de shalung ban shala maku law law rawt ninghpawng, alap wum, apu majawm, asi gin yum nna hpra law htam sai nga ma ai.

Moi Ninggawn wa Magam mung nga yang, dinghku shang, kashu kasha law law shaprat, lu sut lu su nna nga nga yang, asak aprat kung, baw hpraw kahtan daw, hpang jahtum asak aprat htum, nsoi nsa yum mat wa sai. Ngam nga ai madu jan, kasha kanam ni e jahpu sharut hkungga hte hpawn di nna bru makoi yang, kashu kasha ni hpe nhtang shaman da ya ai rai nna kashu kasha ni mung mangbru bai akyu hkam la sai majaw, mayat maya galu kaba law htam nna mungkan sinpraw sinna dingdung dingda chyam nna bra wa masai nga ma ai. Dai hpang Wahkyet wa Magam mung kaji kawoi hpe mangbru ai akyu hkam la nna galu kaba, nga mu nga mai, mayat maya nna dinghku de, kashu kasha law law lu, nai mam sutgan u, wa yam nga, sagu bainam sut su, ja bau yam nga hte mayu dauma kahpu kanau hku masing shangang nna nga nga yang, asak kaba gawng kung, n jin n ngut wa sai rai nna yup raw yup ra kaw sha shanu nga mat sai. Kade nna yang, shi si mat sai, shi hpe mung ngam nga ai madu jan kasha kanam hte makyin jinghku ni e mangbru poi galaw ya ai gaw manau poi daram jahkik nna jahpu sharut hkungga hte shawawn ai gaw Wahkyet Magam mung kaji kawoi ni a ga de prat janat shim mat sai nga ma ai. Ngam nga ai nta masha ni gaw kanu kawa kagu kamoi ni hpe bru makoi ai akyu hkam la nna nga mu nga mai mayat maya hkam ja nna nga ta masai nga ma ai.

Wahkyet wa Magam a hpang e Maran wa Ning-yan Naw gaw kajum kaji hpe bru makoi ai shaman chyeju lu la ai rai nna dinghku de, kashu kasha law law shaprat, hkau hting hkau na, hkarang shatam yi baw kaba hkyen, nai mam nhpraw nhkyeng, manaw shingnan hpaga asut, hkaipyek shangma, u gum, u ra, chyahkyen bainam, suyang dumsu, loilung loi lang, gumra lawze sanat miba, htunawng hkra nawng, didam, au ma, pasi bakang, bau sa yam sa, lung hpau palawng, lakhkyik yam sa, sut su nna nga sai. Kashu kasha ma lat ma Shawng, lapran Kying Nang bin htum htang Hkawn shayi shadang, shayi shingwoi kaye, shadang n-gang hpye nna mung nga nga sai. Kahpu kanau shat jaw jahproi, mayu ni a sharung kungdawn sha, shayi dauma ni a dinghkawn hpu hta sha rai, dauma kashu kahkri hpe kungdawn shakau jaw, jahproi nna nga ta sai. Kanam hpungdim la shagu, wan wut di dun ra nna nga nga yang, asak ugut gu, baw hpraw kahtan daw, tsam ku, shanut nu, ningnen machyi lawt, dingla machyi shang nna yup raw yup ra machyu, nsoi yum, nsa htum mat wa sai.

Shi hpe mung jinghku jing-yu mayu dauma kahpu kanau jahkum, jan shata alawng hkringwa dumsa shaga nna tsamun dara dang, dinghkawng majai chyang dumsa e jahpu ap, sharut hkungga tap nna mangbru lamang ngut, yung myen layung gu, mangbru nhtoi htum ai shana de gaw tsamun dara dang, dumsa e kaji kawoi wa num maw matsun, tsamun wa lam madun, kaji kawoi ni nga ai ga de matsun madun nna chyashim maga shim, tsalim maga lim mat wa sai nga ma ai. Ngam nga ai madu jan kasha kanam ni gaw kaji kawoi kagu kawa kajum kaji hpe bru ai akyu hkam la nna nga mu nga mai, mayat maya galu kaba nna nga ta masai nga ma ai.

Dai hpang Pungga Tu Shan gaw kaji kawoi hpe bru makoi ai shaman chyeju hkam la ai rai nna hkaram Pungga ga e mayaw htinggaw de galu kaba wunli lu, kashu kasha dingrawng, lakung lashan kung rawng kung ran, shi dap htingnu gran, shi bai daw hpum jun, hkun lam magaw bu nna sut yang nau ra wang nna nga nga sai nga ma ai. Shadip mare de, jali num shang hpaw, agyi salang hkinjawng hkring mang san, kahtawng ninghtawn chya rai, lamu madai nau, matsaw ningtsa jau, gumgun gumhpai jau, ju manau dum, mungkan nga sharat gara, tsali lit jaw shawa wang, tsagun lit ya marai jinghkam shang nna mung nga nga sai nga ma ai. Kahpu kanau hku masing shangang, mayu dauma ra galaw, lawu lahta shat jaw jahproi, shahpung jum dwi jaw, shachyang jum bawn yaw, ndaw nbang sut pinra ra nna nga nga yang, asak ugut gu, ningnen machyi lawt wa ai majaw, gumgun gumhpai lamu madai ni hpe shagu hkungga ya nna shi a gawq kan mangau shangang yu tim, jan sumri nu, shata sumri ku nna kasha kanam ni e jum nga dinglen e aman mau, kahtan lau, chyasam man man, katsan kahtan htan mat wa ai rai nna kasha ni e shangai chyinghkai wa e ngu yu tim n htan mat sai.

Kanam ni e agu amoi ni e ngu tim, nhtan mat sai majaw, manghkang mang tawn mang wawn nna mang shin nhtawm, dumsa hkringwa shaga nna dinghta amying dawm, katsan amying shamying rai, shalen galaw numjang shajaw rai, kaji kawoi wa lam garai n madun ai laman e gaw jahpawt shana n-gau htu nna shat jaw shat jau tawn da ai nga ma ai. Shing rai htap htuk ai latsai da-u galaq nhtawm, da-u hta shatsawm bang nna lawu lahta, bading sumtsan lasu su, mayu dauma kashu kahkri, hpu nau ni yawng mayu bunghkaw hte du, tsit karoi jun, lupding lupwa de marang hkinchyang gap, jahpu sharut dan, bau nu bau sa gindawng nna dumhkring kabung dum, sut ndawng gumlawt, katsan ndawng gumjawt rai, ju manau daram jahkik rai, mangbru poi galaw nna mangbru poi lamang gu ai jahtum shana gaw dumsa hkringwa e jan hkaw madun shata hkaw de shalun nna tseng di kau sai nga ma ai. Dai hpang htawm nga htawm pra ni gaw mangbru poi ning-ran, si lam num maw maban gaw shi jun da, htan lam num maw shoi mawng aju gaw shi grang da sai nga ma ai.

Dai hpang Pungga Tu Shan a kasha Pungga Ja Tang gaw kawa hpe bru makoi ngut nna mungkan hpaji sharin, kashu kasha shaprat, mayat maya, moi na makam hta hkristu hpe kam ai makam jat la, hkalup hka shin hkam, kashu kasha ni hpe mungkan hpaji chye la na lam hpaw, madu Yesu hpe kam sham na mahkrun shaw nna nga yang, aprat sak htum, shadawn jitna gu sai rai nna zahpaw wa Njang Dung buga sagu lawng kaw hpung masha manang, kasha kanam ni e gawn lajang nga ai kaw madu Yesu nan woi la sai rai. Shing rai shi a asak wenyi hte seng nna hpa tsang n ra sai majaw, shi a hkum tsawp hpe gaw kahpu kanau mayu dauma makyin jinghku ni rau Karai Kasang a sagu rem kasa, hpung up sara ni hpe shaga nna si shakram da ai kasha kanam kashu kahkri ni hpe Karai Kasang a wenyi lu la na matu, shalan shabran kyu hpyi hpawng ngut jang, san da ai lupding lupwa de makoi nna lup hpe gaw kagam ga hte gaw shangang da sai rai.

Rev. Pungga Ja Li (jinghpawkasa kawn shaw la ai )