Shatapru Buga Hkalup Hpung a (25) NIng Jubeli aten du hkra na labau-SHATAPRU

1. Shatapru buga hpung byin tai hpang wa ai lam                                                                                                               Mare garai nnga ai ten kaw nna ndai lamu ga gaw Jinghpaw amyu sha ni hte seng ai lamu ga rai nna Lawhkum Karing Du ni sin rem madu tai ya lai wa sai shara rai nga ai .NO.(2) mungkan majan a shawng e Ingalik Asuya bungli gun ai Jinghpaw Wunpawng sha ni htinggaw (19) nga lai wa sai shara mung rai nga ai .NO.(2) mungkan majan ngut ai hpang ( 1948 ) ning kaw nna buga hpung byin tai wa na npawt hpang wa sai .Lani hte lani hpung htinggaw law jat wa ai gaw ,buga hpung (25) ning hpring Ja Jubeli galaw ai aten hta hpung htinggaw (685) du nga sai lam chye lu ga ai .                                                                                       2.Nawku hpawng hpang wa ai lam                                                                                                                                   NO.(2) mungkan majan ngut nna masha nga hpang wa ai shaloi malawng gaw nat jaw htinggaw ni rai ma ai .Dai ten hta hpung masha mi gaw Sara kaba Tegebfeldt woi awn nga ai Myitkyina hpung sasana jawng kaw nawku daw jau ai lam hta shang lawm nga ai re .                                                                                            Lani hte lani hpung htinggaw law jat wa ai majaw , mare kata e nta dinghku hkan e laban nhtoi langai nta langai htawt let nawku hpawng de ai lam galaw hpang wa sai .Slg.Sana Tang , Du Mashaw Naw hte Du Agu Di ni nta hkan e shaning law law galaw hpawng de sai lam chye lu ai .Dai ten na hpung hpe woi awn ai kanu kawa ni gaw Slg.Sana Tang ,Du jan Maran Laika Ja Tawng hte Du jan Nang Kying ni rai ma ai .1954 ning kaw nna Num hpawng ,La hpawng ,Ramma hpawng ni hpe mung nta hkan e hpawng de hpang wa sai .Laban jawng ( Sunday School ) hpe Saranum kaba Lasang Lu Bu kawn woi awn npawt hpang dat ya ai kaw na hpung lawk shagu hta laban jawng nga wa ai lam chye lu ga ai .                                                                   Buga kata e hpung Sara garai nlu ai majaw Nbawn Lup mare na Hpt.N-yau Kam hpe karum hpyi la let shabrai madi shadaw ai hte woi awn lai wa sai .Buga hpung a shawng nnan lang na Hpungtau Jadup La mung grai woi awn lai wa sai sha n-ga ,Slg. Htang Tang mung hpung chyare tai shakut lai wa sai re .Tinang lagaw hta garai nlu tsap lu yang Manhkring mare Hpung Sara Tha Htoo hte, Myo Hpung na Rev.Lashi brang ni kaw na mung yu lanu gawan katsan lai wa sai lam labau hta mi chye lu ga ai .                     3.Nawku Jawng hte wang lu la ai lam                                                                                                                           Shatapru buga hkalup hpung nawku jawng wang htingra gaw moi shawng e Gorahka ni a hkauna hte kumshu sun galaw sha ai shara re .Jinghpaw mare de hpang wa ai ten hta Hkristan htinggaw ni law jat wa ai majaw mare a myitsu salang ni gaw shawng lam na matu myit sawn yu let , nawku jawng hte wang htingra tam lajang ai lam hpang wa sai .                                                                                                                                 Dai lam hta Du janMaran Laika Ja Tawng hte Du jan Lahpai Nang Kying ni lit la ma ai .Ndai wang htingra hpe buduza shap nna kanaw shawt shatsawm kau let wang shadaw masat jun nna ( 1954 ) ning hta lu masat la sai re .Dai aten na sasana wang gaw ya na Shatapru Asuya lahta tsang jawng wang mung lawm ai lam chye lu ai .Ya na Sasana wang ndai hpe Asuya ni kaw nna lu la hkra yak hkak lam amyu myu hpe shakut makawp maga lai wa sai kanu/wa ni gaw ,Hpt.Jadup La, Slg.Lahkri La Lawm hte Slg. Sana Tang ni rai ma ai .----------hpang na lang bai matut na ------------STU BUGA NSEB - 7